Ek weet daar word gesê dat die weke
vlieg en mens moenie jou tyd omwens nie, en dat jou werk ‘n belangrike deel van
jou lewe is… maar ek is tóg ‘n voorstander van heerlike bevredigende vrye tyd
in mens se lewe!
Daardie effense tinteling van weet
daar lê drie aande en twee volle dae voor jou waar jy seker kan werk inhaal, of
huis skoonmaak en dergelike sleurtake of dalk moet jy werk toe gaan… of jy kan
enige of allerhande dinge doen om die lewe lekker or gemakliker te maak, om die
gejaagdheid en die druk te ontsnap.
Jy kan laat slaap of , soos ek, in
die bed lê met ‘n warm koppie tee en die koerant wat al die week se nuus gee, of jy kan vroeg gaan gym en dan het jy
meer energie vir die dag.
Jy kan besluit om ontbyt op die stoep
te eet en dan dalk in jou tuin te werk.
Jy kan ‘n vriendin nooi om saam te gaan koffie drink by ‘n mooi
koffiewinkel of jy kan ,soos ek ,interessante dvds by die biblioteek gaan haal
om oor die naweek te kyk
Dan is daar die naweek-wegbreek wat
nou eintlik die heel lekkerste is – en ek beveel dit sterk aan as jy opgewen soos ‘n tol voel. Dan
soek jy al teen Woensdag op die Internet vir ‘n plekkie wat nie te ver is nie
( gedagtig aan die petrolprys) en dan
pak jy al Donderdagaand daardie naweektas en as jy klaar gewerk is Vrydag, dan
val jy in die pad!
As jy nie so gelukkig is nie, dan
doen jy alles op die Saterdag, en dan gebruik jy Sondag vir die regte doel- om
te rus. Dis mos ‘n Bybelse opdrag, en daar is hele paar maniere om te rus. Jy
gaan kerk toe verkwik jou siel en gees. Jy doen niks wat inspanning verg nie,
en na middagete gaan slaap jy of lê en luister mooi musiek, lees ‘n boek en
raak sommer bietjie stil voor die aanslag van nog ‘n besige week!
Ek het ‘n Engelse gedig op skool
geleer wat gesê het : “What is this life if we have no time to stand and stare….? Sy naam was "Leisure"
So kan jy maar jou Sondag om sit. Hoekom nie?
Ek is oortuig daarvan dat elke mens
die rus en ontspanning van ‘n naweek nodig het ! Viva Vrydae, Viva die naweek!!
Comments
Post a Comment